Sjømat er viktig for folkehelsa

-Å få folk vekk frå fiskefatet kan få alvorlege konsekvensar for folkehelsa. Det sa Margritt Brustad frå Institutt for samfunnsmedisin i si innleiing på møtet i Nordområdeforumet i Tromsø fredag.

Kari Johanna Tveit

Er det trygt å ete norsk sjømat? Det var temaet på møtet i Nordområdeforumet som vart arrangert i Tromsø fredag. Frå politisk hald deltok både Miljøvernminister Helen Bjørnøy og politisk rådgjevar i Fiskeri og kystdepartementet Kari Anne Larsen. I tillegg deltok Rasmus Hansson frå WWF, Jarle Klungsøyr frå Havforskningsinstituttet og Margritt Brustad frå Institutt frå samfunnsmedisin. Svein Berg frå Eksportutvalget for fisk var debattleiar.

Miljøvernminister Helen Bjørnøy var klar i talen når ho framheva at alle har eit ansvar for miljøet, og at alle stoff som vert slept ut i naturen har ein konsekvens. Ho påpeika at det vert arbeida med opprydding av miljøet, mellom anna i fjordsystem som i dag er så forureina at det vert gjeve kosthaldsråd for inntak av sjømat frå desse områda. I tillegg framheva miljøvernministeren at politiske myndigheiter arbeidar både nasjonalt og internasjonal for å få bukt med miljøproblema. Her viste ho mellom anna til kor viktig det er å få bukt med all forureininga som kjem nordover med havstraumane.

Rassmus Hansson påpeika at oppdrettsnæringa har pådratt seg ei rekkje miljøkrigar som kan vere til skade for næringa. Han meinar feit fisk er giftig og syns det er vanskeleg å seie til folk at det er greit å ete den så lenge den inneheld miljøgifter.

Etter Hansson si innleiing la Margritt Brustad frå Institutt frå samfunnsmedisin fram eit reknestykke der ho samanlikna faren for å få kreft ved inntak av miljøgifter gjennom fisk og faren for å dø av livsstilssjukdommar dersom ein ikkje et fisk. Og konklusjonen hennar var heilt klar.
- Kosthaldsråd som får folk vekk frå fiskefatet vil kunne få alvorlege konsekvensar for helsa vår, sa Brustad til deltakarane på møtet.

Geir Ove Ystmark i Fiskeri og havbruksnæringens landsforening framheva i sitt innlegg under debatten at havbruksnæringa tek utfordringane om miljøgifter i fisken på alvor, og påpeikar at det alt er gjort masse for å reinse fôret.

Svein Berg i Eksportutvalget for fisk var debattleiar, og han oppsummerte møtet slik:
- Det er trygt å ete norsk sjømat, og dei som ikkje gjer det er dumme.