Storaksjon mot lakselus

Mattilsynet gjennomfører i vinter ein kampanje med koordinert vinteravlusing i oppdrettsanlegg frå Rogaland i sør til Møre og Romsdal i nord. Målet med aksjonen er å få ned lusemengda og dermed gje villaksen og sjøauren betre sjanse til å overleve.

Lakselus er eit alvorleg trugsmål mot stammane av villaks og sjøaure, og Noreg har ein særskilt internasjonal plikt til å verna om desse unike artane, skriv Mattilsynet.

- Alle må lyfte i flokk
Fleire fag- og forvaltingsinstansar, inkludert næringa, har uttrykt ynskje om at Mattilsynet må kome sterkare på banen og gjere noko med lakselusproblemet i tilknyting til villfisken.
- I heile haust har Mattilsynet difor jobba tett med fagmiljøa, fiskehelsenettverka, fiskehelsetenesta og næringa for å kome fram til den beste mogelege framgangsmåten for å gjere noko med luseproblematikken, fortel Ragnar Thorarinsson i Mattilsynet.

Det er fyrste gong i oppdrettshistorien at ein så stor og koordinert avlusingsaksjon vert gjennomført.
Erfaring frå fiskehelsenettverka syner at godt organisert og samordna vinteravlusing er vegen å gå. Mattilsynet vil nytte seg av denne erfaringa i kampanjen som omfattar oppdrettarar langs heile Vestlandet.
- Skal vi lukkast er det heilt avgjerande at absolutt alle deltek og gjer jobben sin til rett tid. Difor kjem alle oppdrettarane til å verte pålagt å delta, seier Thorarinsson.

Mattilsynet presenterte nyleg kampanjen på eit møte med oppdrettarar frå Rogaland til og med Møre og Romsdal.
- Tilbakemeldingane var særs positive, og min oppfatning er at alle ynskjer å gjere sitt for at aksjonen skal lukkast. Vi fekk òg diskutert ulike praktiske problem, og rydda av vegen mange av dei utfordringane som kan dukke opp.

Aksjonsstart i desember
No gjenstår det å få dei siste detaljane på plass.
- Vi reknar med at opplegget og planane er heilt klare i byrjinga av november, og då vil alle aktuelle oppdrettarar få informasjon og instruksjonar, lovar Thorarinsson.

I aksjonen skal oppdrettarane fyrst rapportere inn tall på lus på eit bestemt tidspunkt til det lokale distriktskontoret i Mattilsynet. Avhengig av lusenivået og kvar anlegget ligg, vil dei så få instruks om når dei skal gjennomføre lusebehandlinga. Sjølve lusebehandlinga vil sannsynleg starte i midten desember i sør, og så fortsetje i bestemte områder nordover til ut på nyåret.
- Kyststraumen går nordover, og difor må òg vinterkampanjen gå nordover som ein samorda ”avlusingsbølgje”.
Veterinærinstituttet og Havforskningsinstituttet skal saman evaluere kampanjen. Avhengig av resultatet frå denne runden kan det bli aktuelt å gjennomføre ein ny avlusingsrunde til våren for å få eit best mogeleg resultat.
Mattilsynet vil kome med meir informasjon om aksjonen så snart opplegget er klart.