Fisketransportør trugar med å flagga ut 33 vogntog

Ein av dei største fisketransportørane i Noreg, Byrknes Auto i Gulen, trugar no med å flagga ut heile bilparken. Mest sannsynleg vert då bilane frå Gulen registert i Polen eller eitt av dei baltiske landa.

- Vi merkar no at anboda og lasta forsvinn til billegare aust-europeiske selskap. Og det er kun på pris vi taper, seier administrerande direktør Stein Inge Larsen i Byrknes Auto til NRK Sogn og Fjordane.

Han har hundre sjåførar og 33 bilar i selskapet som har hovudbase på Byrknes i Gulen. Transportøren har spesialisert seg på frakt av fisk.

Køyrer gratis
Utanlandske vogntog fyller billeg diesel i heimlandet. Dei vogntoga som har utanlandske skilt, får aldri tilsendt rekning frå dei mange autopass-stasjonane rundt i landet. Difor køyrer dei nærast gratis på norske vegar.

Samstundes må norske transportselskap betale både bom og dieselavgift. Skilnaden i pris per transportoppdrag blir på fleire tusen kroner.

I dag blir norske lastebileigarar i stadig større grad utkonkurrert av utanlandske transportselskap som pressar ned prisen på last langs norske vegar.

- Blir det ikkje likare vilkår her, så må eg flytte ut av Noreg. Då er det i Baltikum eller Polen eg må registrere bilane mine, seier Stein Inge Larsen.

Høgre-forslag
I desse dagar får lastebileigarane ei handsrekking frå Høgre. Partiet vil innføre ei ny avgift som gjer at utanlandske vogntog må betale avgifter og bompengar på lik linje med dei norske.

Norsk Lastebileigarforbund støttar forslaget frå Høgre.Fylkesleiar Per Andreas Øren i Norges Lastebileier Forbund (NLF) i Sogn og Fjordane seier til NRK at tusenvis av arbeidsplassar i næringa kan ryke. Dei vil forsvinna over til utanlandske køyretøy.

Fylkesleiaren meiner at dei utanlandske transportørane bør betale for å komme inn i landet. NLF krev at dei alle får autopass-brikke ved innpassering til Norge, slik at dei er med og betalar bompengar. Andre land tek betalt av utanlandske køyretøy.

NLF meiner i tillegg at utanlandske lastebilar tar med seg altfor mykje diesel inn i landet, til dårleg kvalitet, som mellom anna gir meir forureining.