Gebyra var truleg for høge

-Vi konstaterer at gebyret til ni oppdrettarar som er tatt for å ha for mykje laks og aure i merdane er sett for høgt, seier ekspedisjonssjef Magnor Nerheim i Fiskeri og kystdepartementet. No skal Fiskeridirektoratet vurdere gebyra på nytt.

Kari Johanna Tveit

I går vart det kjent at Fiskeri- og kystdepartementet vil be Fiskeridirektoratet om å vurdere nivået på gebyra til oppdrettarar som er tatt for å ha for mykje laks i merdane, på nytt. I fylgje Magnor Nerheim handlar dette om at departementet etter ei heilskapsvurdering har kome fram til at forskrift om reaksjonar § 10 første ledd ikkje har tilstrekkeleg heimel i akvakulturlova.

Bakgrunnen gjennomgangen er Sivilombudsmannen si vurdering av usikkerheit i høve til om det er tilstrekkeleg heimel i dagens lovverk å krevje inn gebyra. Han la spesielt vekt på storleiken, og om dei er i tråd med Grl. § 96.

Sidan § 10 legg til grunn ein bruttoverdi utan at det i tilstrekkelig grad vert tatt omsyn til oppdrettaren sine utgifter som grunnlag for berekning av forteneste ved å bryte regelverket, må gebyra vurderast på nytt. Og i fylgje Nerheim handlar det ikkje om at oppdrettarane slepp unna straff slik ein kan få inntrykk av i ein del nettaviser etter pressemeldinga frå Fiskeri- og kystdepartementet vart sendt ut.
-No må ein vurdere kor mykje dei har tent på ulovleg meirproduksjon, og sørgje for at det i framtida ikkje er mogeleg å tene pengar på å drive ulovleg. Vi har også bedd Fiskeridirektoratet om å vurdere i kva grad dei mest alvorlege tilfella bør vurderast av ein domstol, seier Nerheim til Norsk Fiskeoppdrett/Kyst.no.