Det er truleg IPN som gir auka dødelegheit

Mattilsynet har misstanke om enno eit utbrot av ILA på ein av lokalitetane til Arnøylaks i Nord-Troms, men dagleg leiar Tor Nygaard trur ikkje det er denne sjukdomen som påverkar dødelegheita i anlegget. Det er litt meir fisk som døyr, men eg trur årsaka er IPN og ikkje ILA, seier Nygaard.

Kari Johanna Tveit

Siste veke melde Mattilsynet om mistanke om utbrot av ILA på ein av lokalitetane til Arnøylaks i Nord-Troms. No ventar dei på at Veterinærinstituttet skal kome med resultatet etter analysen.

Laksen i den aktuelle merda har også IPN, og Nygaard trur det er denne sjukdomen som gjere at ein har ei viss dødelegheit i anlegget.
-Det meste av laksen som døyr, og som har vore undersøkt har IPN og ikkje ILA, framhevar Nygaard ovanfor Norsk Fiskeoppdrett/Kyst.no

To ulike virusstammar
Selskapet har fått påvist ILA to gongar dei siste åra, men i fylgje Nygaard har det vore ulike stammar av viruset, noko han tolkar som positivt oppi det heile.
-Det er jo eit teikn på at dei tilsette hjå oss gjer ein god jobb med tanke på å hindre spreiing av viruset. Vi har ikkje hatt stor dødelegheit på fisken dei andre gongane, og eg håpar det ikkje blir eit alvorleg utbrot denne gongen heller dersom det viser seg at smitten vert påvist på nytt, seier Nygaard.

ILA gir høge kostnadar
Han framhevar at selskapet ikkje har mista mykje fisk dei to gongane dei har fått påvist ILA, men krav frå Mattilsynet i samband med brakklegging og ulike forordningar knytt til utbrota har likevel medført store kostnadar for selskapet. Saman med ein del investeringar i nytt utstyr som dei har vore nøydde å gjere i samband med utbrot, har utlegga kome på meir enn 10 millionar kroner. I tillegg kjem tap på grunn av forsert slakting og utslakting av små fisk.
-Vi gjer ein grundig jobb for å fylgje opp pålegg på same tid som det heile tida vert teke prøver av fisken for å sjekke at den er frisk. Og sjølv om det kostar pengar trur eg at vi i det lange løp tenar på å gjere ein skikkelig jobb på dette området, seier Nygaard til Norsk Fiskeoppdrett/Kyst.no.