Vil stoppe Salmar-planane i Brandal
I ei tilråding til Hareid formannskap sitt møte komande måndag rår rådmannen til å seie nei til Salmar Organic sine planar om lakseoppdrett i området Brandal-Kvitneset.
Denne artikkelen er tre år eller eldre.
Framlegget til vedtak har slik ordlyd:
«Formannskapet viser til at plassering og forankring av anlegget utanfor NFFFA-sona i kommuneplanen kjem i konflikt med lokale fiskeriinteresser og friluftsinteresser i området, og finn ikkje grunnlag for å gi dispensasjon etter PBL § 19.2. Søknad datert 17.10.2013 frå Salmar Organic AS om dispensasjon frå kommuneplanen for etablering av marint akvakulturanlegg utanfor NFFFA-sona i Brandal vert såleis ikkje imøtekomen.»
Saken:
Salmar Organic AS tok over oppdrettskonsesjonane etter Atlantic Cod Farms (ACF) i Hareid, og har søkt om å få etablere seg med oppdrett av laks på dei lokalitetane Atlantic Cod Frams nytta til torskeoppdrett (i tillegg til Brandal har dei også søkt om lakseoppdrett ved Haggardsneset og Terneberget sør i Almestranda). Haggardsnes-planane er avslått på grunn av for kort avstand til eit lakseslakteri på Vartdal, skriv Vikebladet.no
Stort engasjement
Den omsøkte plasseringa i Brandal ligg delvis utanfor eksisterande avsett NFFFA-sone i kommuneplanen og lenger nord og aust enn tidlegare godkjend lokalitet.
På grunnlag av stort engasjement frå lokalmiljø og i lokalavis i høve oppdrettsplanane i bl. a. Brandal heldt kommunen eit folkemøte/informasjonsmøte om saka i Ishavsmuseet 13. mars. Ca 150 personar deltok, og frå salen vart det vist stort engasjement mot planane i Brandal.