113 millionar til laks

Kari Johanna Tveit Eksportutvalet for fisk aukar budsjettet for laks med ti prosent. Den største auken vil skje i Aust Europa, men det vert også litt meir å rutte i andre marknadar. Budsjettet for Russland aukar frå sju til fjorten millionar kroner og Børge Grønbech i Eksportutvalet for fisk forklarar auken med at denne marknaden no er i ferd med å opne seg for majoriteten av laksebransjen. Så langt har det vore satsa mest i dei største russiske byane, men det skal også diskuterast i kva grad ein skal jobbe meir utover i regionane. Eigne pengar til Ukraina For første gong er det sett av eigne pengar til å drive marknadsføring i Ukraina. -I budsjettet til neste år er det sett av to og ein halv million kroner til arbeid med marknadsføring i Ukraina. Her har vi hatt ei fin utvikling i kjøpekraft og det er gjort store investeringar i utbygging av kjøpesenter som gjer distribusjonen av laks mogeleg, seier Grønbech til Norsk Fiskeoppdrett/kyst.no. Plussar på i fleire land Også andre land får plussa på sine budsjett til neste år. I Kina går budsjettet opp frå tre til fem millionar kroner. Dette forklarar Grønbech med at norsk laks har fått rotfeste i denne marknaden og at bransjen trur på ei vidare utvikling her. I Portugal aukar budsjettet frå tre til fire millionar kroner. Denne auken vert forklart med at portugisarane er eit sjømatetande folk og at det ligg eit potensial i å jobbe meir med denne marknaden.

Mindre behov for å arbeide med avtalar Tidlegare var det sett av seks millionar kroner til administrativt arbeid for å skaffe tilgang til marknaden. No er dette budsjettet redusert til tre millionar kroner. Det forklarar Grønbech med at tilhøva i Russland er i ferd med å gå seg til, og at ein ikkje lenger har minstepris på laks og aure til EU.