7 mill. kr til berekraftig havbruk

Det største tilskotet frå Hordaland Fylkeskommune går til UNI Miljø sitt prosjekt for å sikra laksen i Vosso. Prosjektet får 4,13 mill. kr i tilskot fordelt over tre år.

Med utgangspunkt i prosjektet Vossolaksen er det foreslått ei utvida områdetilnærming til Osterfjordsystemet. Det skal gjennomførast tiltak for å fremja sameksistensen mellom havbruksnæring og villfisk. Eit av hovudmåla er å koordinera samarbeid mellom interessentar i området. Prosjektet – kalla Vosso områdetilnærming – er eit samarbeid mellom villfiskinteressene, forvaltinga og oppdrettsnæringa i Hordaland.

Ambisiøst Opplegget for prosjektet er svært ambisiøst og kostnadskrevjande. Programmet er fleirårig og byggjer på Vossoprosjektet som har vore i drift sidan 2010, mellom anna med støtte frå fylkeskommunen sitt regionale utviklingsprogram (RUP-Hordaland). Samla kostnadsramme er på 10,75 mill. kr, skriv Hordaland Fylkeskommune i ei pressemelding.

Relevant for å bøte på skader frå havbruk I saksutgreiinga heiter det at prosjektet er i svært relevant i høve til å bøta på skadeverknadane av havbruk på vill fisk i Hordaland. Det vert også trekt fram at prosjektet har miljømessig relevans og relevans for å skaffa kunnskap og praktiske løysingar for berekraftig havbruk.

-Seks andre prosjekt får tilskot på im alt 2,87 mill. kr.

Etne Etne elveeigarlag får 265 000 kr i 2011 til kultiveringstiltak. Laksetrappa i Håfoss skal utbetrast for å gje villaksen tilgang til verdifulle gyteområde og dermed auke smoltproduksjonen i vassdraget. Det skal installerast videoutstyr med fisketeljar i øvre del av laksetrappa.

Fisk og plantar NIVA Vestland får 710 000 kr fordelt over tre år. Hovudformålet er å få fram kunnskap om utnytting av avløpsvatn og oppdrettsslam frå landbasert fiskeoppdrett. Dette skal verta eit godt grunnlag for utvikling av integrert produksjon av fisk og plantar.

Tilsskotet vert fordelt med 250 000 kr i 2011, 400 000 kr i 2012 og 60 000 kr i 2013. Totalkostnad for prosjektet er 1,36 mill. kr.

Sjudomsfri stamfisk Cleanfish AS får 1,2 mill. kr i tilskot til prosjektet «Sjukdomsfri stamfisk». Gjennom målretta utvikling av stabil yngelproduksjon av ei effektiv luse-beitende berggylte, er målet å få fram eit «biologisk verktøy» mot lakselus. Planen er å få dette til ved å utvikla ei trygg og sjukdomsfri stamfisklinje for framtidig produksjon av leppefisk. Tilskotet vert fordelt med 600 000 kr kvart av åra 2011 og 2012.

Med mål om å skape eit tverrfagleg seminar Norges jeger- og fiskerfordund (NJFF) Hordaland får 100 000 kr i tilskot til Hardangerfjordseminaret i 2011. Målet er å utvikla seminaret som den beste tverrfaglege møteplassen for ei berekraftig utvikling i Hardangerfjorden.

Klekkeri og fiskefelle NJFF Hordaland får i år også 220 000 kr til prosjektet «Klekkeri og fiskefelle».Målet med prosjektet er å samarbeida med forskarar om konkrete enklare forskingsprosjekt der klekkeriet og fisk eller rogn frå dette kan inngå. I tillegg ønskjer NJFF Hordaland å nytta klekkeriet til undervisning av skuleelevar i biologi og økologi. Fiskefella er tenkt å gje informasjon om utviklinga av sjøaurebestanden i vassdraget og vera eit reiskap for å fjerna rømt oppdrettsfisk.

Hardanger villfisklag Hardanger villfisklag får 375 000 kr i 2011 til utrusting av lokale grupper som skal fanga rømt oppdrettsfisk. Midlane skal brukast til å utrusta lokale grupper i Etne, Odda, Kvam og Granvin for at desse skal kunna gjennomføra utfisking av rømt oppdrettsfisk på gyteplassar i elvane. I samråd med kompetent miljø vil det verta skaffa tenleg utstyr for uttak, handtering og dokumentasjon av rømt oppdrettsfisk.

Marin tilskotsordning Målet med tilskotsordninga er å styrkja Hordaland som oppdrettsfylke, mellom anna ved å finansiera tiltak som kan sikra ei berekraftig havbruksverksemd i eit langsiktig perspektiv. Marin tilskotsordning har motteke 25 søknader om støtte, samla søknadssum var på over 30 millionar kroner.