FishEx er offisielt opna

Kari Johanna Tveit FishEx som råvarebørs for finansiell handel med sjømat vart i dag formelt opna i Noregs Råfisklag sine lokale i Tromsø. Styremedlem Kari Riddervoll frå Sparebanken Nord Noreg ønskte velkomen og presenterte styret for selskapet, medan rektor Jarle Aarbakke ved Universitetet i Tromsø fekk ringe i klokka og gjennomføre den formelle opninga. Handelen er i gang FishEx som marknadsplass for finansiell handel med sjømat og med garantert oppgjer, er godkjent av Finansdepartementet, i tråd med børslova og etter anbefaling frå Kredittilsynet. I dag er alt det formelle på plass og handelen er i gang. - Vi er veldig glade for at er på plass. I dag får aktørane i sjømatnæringa endelig eit verktøy for å sikre prisen, sa administrerande direktør Jan Fossberg i FishEx til forsamlinga. Ikkje-manipulerbar referansepris All handel føregår i sanntid på web og kjøper og seljar er anonyme. Alle oppgjer vert garantert gjennom Nord Pool Clearing, ut frå ein dynamisk og ikkje-manipulerbar referansepris basert utelukkande på tal frå Statistisk Sentralbyrå. -Ein slik handelsplass må basere seg på tillit, og alt vi gjere må vere transparent og dokumenterbart. Det må heller ikkje vere teoretisk mogeleg å manipulere prisen. Dette er utruleg viktig, seier Jan Fossberg til Norsk Fiskeoppdrett/kyst.no. Valde FishEx Oslo Børs hadde styremøte i dag og børsdirektør Bente A. Landsnes kunne difor ikkje vere til stades, men i ei videohelsing forklarte ho årsaka til at Oslo Børs har valt å gå inn i FishEx. -Dei siste åra har vi fått mange nye norske og utanlandske fiskeriselskap til Oslo Børs. Dette har vore ei næring i vekst og difor syns vi etableringa av FishEx var interessant. Vi ser at interessa for fiskeri- og havbruksnæringa også vil auke frå den finansielle sida. Vi veit at FishEx vil gi eit godt prissikringsinstrument, og vi var interessert i å gå inn som aksjonær i FishEx fordi ein her kan tilby eit garantert oppgjer, sa Landsnes. Auka finansieringslyst I si helsing til FishEx sa Olav Karlsen i Sparebanken Nord Noreg at han trur etableringa av råvarebørsen for finansiell handel med sjømat vil vere med å auke finansieringslysta. -Det å skape større trygging for prisane er eit godt bidrag for å sikre næringa stabil inntening over tid. Det trur eg vil vere med å auke vår finansieringslyst, sa Karlsen til forsamlinga. Eigarane i FishEx er KapNord Fond, Sparebank 1 Nord-Norge Invest, Troms Kraft, Marinvest (Råfisklaget), Sparebank 1 SR- Investering, Oslo Børs og Sildinvest (Sildesalgslaget).