”Haustjakta” er i gang
I går gjekk ”Christina E” frå Tromsø og starta sin del av økosystemtoktet i Barentshavet. Fiskefartøyet er leigd inn som erstatning for ”G.O. Sars”, som for tida er til reparasjon.
Denne artikkelen er tre år eller eldre.
Dermed er ”haustjakta” i gang i Barentshavet. I alt er det fem fartøy som deltek i økosystemtoktet. ”Helmer Hanssen” har allereie gjort ferdig sin del i farvatna vest og nord for Svalbard, medan ”Christina E” og ”Johan Hjort” skal ta for seg den vestlege delen av Barentshavet og farvatna aust for Svalbard. I tillegg skal det russiske forskingsfartøyet ”Vilnjus” dekkje dei austlege delane av Barentshavet, skriv Havforskingsinstituttet i ei pressemelding.
– Vi skal undersøke både botnen, vassøyla og overflata. I tillegg skal vi ha med ornitologar som skal observere fuglelivet, fortel toktkoordinator Lis L. Jørgensen.
Seinare i haust skal forskarar frå Havforskingsinstituttet møte kollegaer ved Pinro (havforskingsinstituttet i Murmansk) for å samordne funna som dei ulike fartøya gjer i løpet av økosystemtoktet.