Innskjerping av regelverket

Tidlegare har ein sett få tilfelle av konsekvensutgreiing av akvakulturanlegg. Med den nye føresegna ynskjer ein å fange opp fleire anlegg. Regelverket er innskjerpa med omsyn til storleik på anlegga, skriv Fiskets Gang. Miljø ein viktig faktor Større akvakulturanlegg (inntil 3 600 tonn maksimalt tillaten biomasse) og settefiskanlegg for meir enn 5 millionar stykk, skal konsekvensutgreiast dersom plasseringa er i eit område som er spesielt miljøømtålig. Etter den nye føresegna har ein no også høve til å føreta konsekvensutgreiing på mindre akvakulturanlegg etter skjøn. -Ein kan til dømes tenkje seg ein søknad for anlegg som skal liggje i eit område for truga eller sårbare artar, til dømes oter. Sidan oteren er ein truga art, må ein truleg vurdere om det trengs ei konsekvensutgreiing i dette tilfellet, fortel Frank Jacobsen, seniorrådgjevar ved Kyst- og havbruksavdelinga i Fiskeridirektoratet. Føresegn om konsekvensutgreiing av 1. april 2005 har som føremål å sikre at omsynet til miljø, naturressursar og samfunn blir ivareteke under førebuing av planar eller tiltak. Føresegna må og ligge til grunn når det vert teke stilling til om, og eventuelt på kva vilkår, planar eller tiltak kan gjennomførast. Regionkontora sitt ansvar -Fiskeridirektoratet er ansvarleg styresmakt når det gjeld akvakultur. Hausten 2004 vart ansvaret for konsekvensutgreiing delegert til Fiskeridirektoratet sine regionkontor, og det er desse som vurderer om eit tiltak skal konsekvensutgreiast, seier Jacobsen. Tiltakshavar pliktar å opplyse om alle tilhøve som kan ha interesse for ei eventuell konsekvensutgreiing, og det er også han som må koste denne. Fiskeridirektoratet tek endeleg stilling til om eit tiltak kjem inn under vedtaka, fastset utgreiingsprogram og avgjer om utgreiingsplikta er oppfylt. Fiskeridirektoratet er ansvarleg for at konsekvensutgreiinga vert halde på rett måte i høve til føresegna; at alle er høyrde, at fristar er overhaldne osb.