Merkeordning gjev hylleplass

Kari Johanna Tveit Forbrukarane stiller stadig strengare krav til kvaliteten på produkta dei kjøper. Men viljen til å betale for god kvalitet og spesielle produkt er også aukande. I fylgje Bernt Ellingsen i KSL Matmerk, er tre av fem forbrukarar villige til å betale 15 prosent meir for mat med god kvalitet. Ein av ti er villige til å betale 25 prosent meir for kvalitetsmat. KSL Matmerk sitt merke "Spesialitet" gjeld for produkt som er produsert i Noreg med spesielle kvalitetar når det gjeld råvarebruk, produksjonsmetode og smak. Ordninga omfattar også nyvinningar. Produkta må representere noko spesielt i høve til dei meir ordinære produkta i butikken. -Ordninga med merket "Spesialitet" er med å synleggjere eit mangfald av eigenskapar til mat produsert på norske råvarer. Det er med å fremje eksklusiv matkultur og tradisjonsmat og det medfører næringsutvikling og lønsemd for bedriftene. I tillegg hjelpe det forbrukarane med å finne god norsk mat, seier Ellingsen. Så langt har fire norske sjømatbedrifter fått godkjent til saman 11 produkt med merket "Spesialitet". Det er Finny Sirevaag AS med reker i lake, Lofotprodukt AS med røykt laks og aure, Sunnmøre Røykeri med røykte fiskeprodukt og røykt økologisk laks og Troll Salmon med produkt av laks. -Vi har opplevd at arbeidet med å få godkjenning også gjev bedriftene større kunnskapar om eige produkt, profilering av produktet og historia rundt det, seier Ellingsen. KSL Matmerk si ordning med merket "Spesialitet" gjev produkta plass i norske supermarknadskjedar. KSL Matmerk har i dag avtale med Norges Gruppen og Coop i tillegg til samarbeid på prosjektbasis med Rica-kjeda. Bernt Ellingsen i KSL Matmerk presenterte denne og andre merkeordningar for studentane på Noregs Fiskerihøgskule på konferansen "Håp i Havet" sist veke.