Nytt fartøyregister

Første versjon av registeret vart lagt ut til ålmenn bruk på direktoratet si nettside i 2003. Året etter vart innhaldet i fartøyregisteret utvida til også å omfatte kvotar tildelt fartøy i tilgangsavgrensa fiskeri. – Heilt sidan starten i 2003 har vi motteke innspel frå brukarane om forbetringar knytt til funksjonalitet, og om korleis ein kunne gje den enkelte brukar betre muligheit til å hente ut meir presise oversikter, seier Anders Østreim, seksjonssjef ved Statistikkavdelinga og ansvarleg for utviklinga av det nye registeret til Fiskets Gang. Liste ut bestemte konsesjonar Dei muligheiter ein tidlegare hadde for å hente ut opplysingar om einkeltfartøy, eller fartøy registrert i bestemte fylke og/eller kommunar samt fartøy med bestemt storleik (største lengde), er framleis tilgjengelege. I den nye versjonen av registeret vil ein i tillegg kunne hente fram fartøy som per dato er tildelt bestemte konsesjonar og deltakarløyve, eller ulike kombinasjonar av desse. Det er også lagt betre til rette for at den enkelte sjølv kan bestemme kva type informasjon som skal inngå i dei ulike listene som kan køyrast ut. – Vi har eit klart inntrykk av at informasjonen i fartøyregisteret vert brukt mykje, både av fiskarane og andre næringsutøvarar og av organisasjonar og institusjonar knytt til fiskeria. – Alle har likevel ikkje fått dekka sitt informasjonsbehov på ein god nok måte fram til no. Vi håpar at den nye funksjonaliteten, spesielt muligheita til å hente ut fartøy som per dato disponerar bestemte konsesjonar og deltakarløyve, vil dekke fleire av brukarane sine behov, seier Østreim. Fangst og tildelte kvotar Fiskeridirektoratet har også utvikla ein eigen og ny modul for å samanstille fangst rapportert inn via salslaga, med tildelte kvotar i tilgangsavgrensa fiskeri. I den nye versjonen vil ein såleis også kunne hente ut informasjon om samla fangst i dei ulike tilgangsregulerte fiskeria som det enkelte fartøy har tilgang til å delta i. Opplysingar om tildelte kvotar og fangst i opne fiskeri (gruppe II) samt fangst relatert til tildelte distriktskvotar, inngår ikkje i registeret. Opplysingar om fangst på ikkje regulerte artar inngår heller ikkje. Fangsttal må tolkast med varsemd Østreim understrekar at dei fangsttal som vert presentert relaterer seg til kvotar tildelt i medhald av konsesjon og deltakartilgang i dei ulike tilgangsregulerte fiskeria. Fangstala kan med dette avvike frå eit fartøy sin faktiske fangst i løpet av året, dersom fartøyet har skifta eigar. – Berekningane av fangst er basert på opplysingar om fangst innhenta frå salslaga. Det kan vere forseinkingar i rapporteringa, som vil kunne føre til skilnad mellom fangst som er lagt til grunn for berekningar av sum fangst og kva fiskar faktisk har landa. Dato (fangst- /landingsdato) på den siste slutt- /landingssetelen som er lagt til grunn for direktoratet sine berekningar av sum fangst går difor fram av dei oversikter som gjeld fangst på kvotar, forklarar Østreim. Fiskeria vert regulert på ulike måtar. I visse fiskeri vert kvotane auka gjennom refordelingar. Når dette kvantum er teke vert fartøykvoten justert tilbake til garantert nivå. I slike situasjonar vil ein i registeret kunne finne fartøy som er registrert med ein samla fangst som er høgare enn dei kvotar som per dato er gjeldande for fartøyet. Slike reguleringar kan innebere eit tilsynelatande overfiske, men ikkje eit reelt. Kystfiskeflåten ei særskilt utfordring Den informasjonen som vert presentert i det nye fartøyregisteret skal «spegle» dei gjeldande innsats- og uttaksreguleringar i dei norske fiskeria. – Regelverket er som kjent komplisert. Det har difor vore ei utfordring å etablere reknemodellar som behandlar kvotar og fangst i kystfisk­e­flåten på ein korrekt måte. – Regulering og avrekning av kvotar i kystfiskeflåten sitt fiske etter torsk, hyse og sei har vore ei særskilt utfordring både i høve til å tildele det enkelte fartøy korrekte kvotar og å relatere landa fangst til desse. Vi meiner no at dei modellar som er etablert gjev eit korrekt resultat, seier Østreim til Fiskets Gang.