Stabile prisar gjev nye marknadar

Kari Johanna Tveit I 2007 vart det eksportert norsk laks for 17,5 milliardar kroner. Dette er ein auke på 403 millionar kroner frå 2006. Målt i volum auka eksporten med 129 000 tonn til 706 000 tonn laks. Eksporten til Frankrike som er det største mottakarlandet for norsk laks auka med 17 prosent frå året før. I volum utgjer dette ein auke på 16.453 tonn frå 97.433 tonn i 2006 til 113.886 i 2007. Eksporten av norsk laks til Russland auka med 53 prosent frå 2006. I volum utgjer dette ein auke på 21.244 tonn frå 40.004 tonn i 2006 til 61.248 tonn i 2007. Den store auken i eksporten til Russland i 2007 samanlikna med året før kan delvis forklarast med importrestriksjonane som hadde stor innverknad på eksporten dit i 2006. Nye marknadar kom for fullt i 2007 Stabile prisar i 2007 medverka til ei sterk utvikling i ein del nye marknadar i 2007. Auken i volum kan ikkje samanliknast med dei store mottakarlanda for norsk laks, men vi fekk mellom anna ei dobling i eksporten til Tsjekkia, Kviterussland og til land i Midt Austen. Eksporten av stor laks til ein del land i Asia auka også sterkt i 2007. Sterk utvikling i Ukraina Eksporten av norsk laks til Ukraina auka med over 100 prosent i 2007. I volum utgjer dette ein auke med 7.187 tonn frå 6.518 tonn i 2006 til 13.705 tonn i 2007. I fylgje Børge Grønbech i Eksportutvalet for fisk er utviklinga i Ukraina eit godt eksempel på kva som skjer med eksporten av norsk laks til ein del nye marknadar. Sjølv om Ukraina ikkje er eit land med lange sjømattradisjonar, så vender dei blikket mot vestlege marknadar. Kjøpekrafta for middelklassen aukar og utbygging av supervaremarknadar og vekst i restaurantmarknaden gjer at ein vil få ei liknande utvikling som ein har hatt i Russland. -I Kiev og andre storbyar i Ukraina finn ein no laks i alle moderne utsal, seier Grønbech og legg til at ein på lik linje med Russland har fått mange nye sushirestaurantar i Ukraina den siste tida. Han trur utviklinga i Ukraina ligg fire til fem år etter det som skjer i Russland. EFF i Ukraina. Eksportutvalet for fisk har ingen har ingen konkrete aktivitetar i Ukraina i dag, men Grønbech viser til at marknadsgruppa føl utviklinga her veldig nøye.