Usikkert kor mykje som er teljefeil

Kari Johanna Tveit I fylgje Karianne Jacobsen i Labora AS kan teljefeil ved levering vere ei av fleire årsaker til at talet på fisk i merden ofte ikkje stemmer med talet på yngel som er kjøpt. For å eliminere teljefeil som årsak til dette, ønskjer oppdrettarane i Codlink å gjennomføre testar av teljeutstyret som vert nytta. Codlink har søkt Innovasjon Noreg om finansiering for å få gjennomført eit prosjekt knytt til teljefeil, men fekk avslag på søknaden. -Dette er ei problemstilling som torskeoppdrettarane ønskjer å få klarlagt og det er eit tankekors at det ikkje finst midlar til slike prosjekt. Dette vil heller ikkje vere den einaste problemstillinga som torskeoppdrettarane i Codlink ønskjer å jobbe med, seier Prosjektleiar Lars Olav Sparboe til Norsk Fiskeoppdrett/kyst.no. Lite frie midlar I fylgje Sparboe har det vore brukt rundt hundre millionar kroner i året på torskenæringa dei siste fem åra, men likevel finst det lite frie midlar til praktiske FoU-prosjekt. Han syns det er rart at ein får avslag på ein søknad om 200 000 kroner for å løyse ei så konkret problemstilling. Årsaka skal vere at dette ikkje er innafor ramma av kva type midlar som er sett av til torskenæringa. Vanskelegare med torsk I fylgje Benedikt Halfdanarson i utstyrsbedrifta Vaki er det vanskelegare for maskinene å telje liten torskeyngel enn større laksesmolt. I tillegg er torsken i saltvatn og det inneber meir skum som gjev skuggar på bileta. Men han meinar selskapet har utstyr som gjer det mogeleg for oppdrettarane å kontrollere teljeprosessen. Det finst midlar I fylgje Geir Askvik Haugum i Innovasjon Noreg i Hordaland finst det enno litt frie midlar til FoU-prosjekt, men det var enklare å få finansiering innafor Det marine verdiskapingsprogrammet som midlane vart tildelt gjennom tidlegare. Haugum kjenner ikkje til akkurat dette prosjektet men han framhevar at det skal vere mogeleg å få finansiering på realistisk utforma prosjekt knytt til problemstillingar med høg relevans, sjølv om ein ikkje lenger har det Marine Verdiskapingsprogrammet.