Simon Nesse Økland, utviklingssjef i Bremnes Seashore, er oppteken av at selskapet skal vera klimavenleg og velge smarte løysningar for framtida. Foto: Bremnes Seashore
- Kursen mot 2050 er sett, og det ser lovande ut
Juleintervju: Bremnes Seashore gjer for tida store investeringar, blant anna i postsmolt. Elektrifisering og klimavenlege løysningar er også med på at utviklingssjefen ser positivt på tida framover for havbruksnæringa.
Havbruksnæringa tar stadig større grep for å bli meir miljøvennleg i produksjon og distribusjon, og Bremnes Seashore er ingen unntak. Selskapet vart i år fyrst ute med å sende laks avgårde med skip på ei nyoppretta rute frå Vestlandet til London. Frå laksen blir henta hjå produsenten på Vestlandet til den er levert til kunden i Storbritannia, tek det om lag 48 timar.
Simon Nesse Økland, utviklingssjef i Bremnes Seashore, seier til Kyst.no at det som verkeleg har vist seg i år, er næringa si vilje og evne til å gjera noko med klimautfordringane.
- Eit døme er satsinga og arbeidet som vert gjort innan utvikling av nye og meir klimavenlege fôringrediensar. Næringa er også i gong med å flytta transporten av fisk frå veg til bane, og frå veg til skip. Krafta og farten i elektrifiseringa har også vore imponerande. Kursen mot 2030 og 2050 er sett, og det ser lovande ut, påpeikar han.
