Terje Breivik har bakgrunn som tidlegare stortingsrepresentant, generalsekretær, parlamentarisk leiar og nestleiar for Venstre. Han og vore dagleg leiar og gründer i breibandsverksemda INO AS og bur i Ulvik.

Terje Breivik vert første daglege leiar i Rolv Haugarvoll

Sjømatkonsernet Rolv Haugarvoll AS, som mellom anna eig Linga Laks AS, har tilsett Terje Breivik som den første daglege leiaren i verksemda. Med tilsetjinga styrkjer styret arbeidet for at konsernet og selskapa i konsernet skal ta nye steg på vegen med å produsera berekraftig mat verda treng, og skapa arbeidsplassar og utvikling i Hardanger.

Kyst redaksjonen
Publisert Sist oppdatert

Styreleiar og eigar av Rolv Haugarvoll AS, Erlend Haugarvoll, seier det både er nødvendig og naturleg at eigarselskapet og familien no proffesjonaliserar eigarforvaltninga av konsernet.

Fakta om Rolv Haugarvoll AS:

  • Eigarinteresser i 13 selskap i sjømatnæringa, med Linga Laks AS som det største.
  • Har ei totalomsetnad på nær 1 milliard NOK.
  • Har totalt rundt 100 tilsette.
  • Hovudkontor i Norheimsund, Kvam herad i Hardanger.
  • Etablert av Rolv og Åsta Haugarvoll i 1978.

- Med eigarinteresser i heile 13 selskap var det ei enkel avgjerd for styret å oppretta dagleg leiar stillinga. Når me i tillegg har tilsett ein harding i jobben, Terje Breivik, med den bakgrunnen og røynsla han har, både som leiar og toppolitikar er me svært fornøygde, seier Haugarvoll i ei pressemelding.

- Ei sentral arbeidsoppgåve for Breivik er, i tett samarbeid med selskapa våre, å utarbeida ein overordna strategi for konsernet. Målet er at me skal verta endå betre på viktige parameter som klima- og naturavtrykk, fiskehelse, etablering av arbeidsplassar i Hardanger, og ikkje minst ta vare på alle dei flinke folka som alt jobbar for oss i dei ulike selskapa, fortset Haugarvoll.

Terje Breivik er svært glad for å verta den første tilsette i Rolv Haugarvoll AS.

- Eg har kjent familien sidan eg var aktiv skiskyttar i ungdommen, og har hatt gleda å følgja den imponerande innsatsen dei har lagt ned for å utvikla konsernet over lang tid. Først Rolv og Åsta, og no Erlend og brørne hans. Å få høve til å jobba i eit konsern som alt gjer ein så viktig jobb med å produsera mat, men og betyr så mykje for trygge, gode arbeidsplassar heima i Hardanger, er så nær draumejobben ein kan koma, seier Breivik.

- Å få vera ein del av eit stort lag som jobbar med mål for auga å sikra nok, berekraftig mat til ei verd der mat er ein knappheitsressurs må vera noko av det mest meiningsfulla og gjevande ein kan halda på med, avsluttar Breivik.

navn rolv haugarvoll as pressemelding