«Knoll» og «Tott» snart klar for drift hos Firda Seafood
Oppdrettselskapet Firda Seafood skal få to nye Risnes-fartøy i flåten, fyrst ut denne veka er overlevering av båten «Knoll».
Denne artikkelen er tre år eller eldre.
Rosendal Marineservice AS har dei siste vekene utrusta to fartøy til Firda Seafood i Gulen, som har fått namna «Knoll» og «Tott». Det fyrste fartøyet skal leverast i slutten av denne veka, og det andre om to veker.
Selskapet får levert ferdig skrog i aluminium med styrehus frå Polen, som dei fullt utrustar i Rosendal. Risnes Marine er kontraktspartnar og kunden deira, og har avtalar med oppdretterane som dei leverer fartøya til etter utrustinga er ferdig.
Overlevert på fredag
Dagleg leiar Svein Arne Sæberg seier til Kyst.no at fyrst ut er «Knoll» som vert overlevert til kunden på fredag, deretter skal dei levere «Tott» om to veker. Båtane har byggenummer 207 og 208.
Selskapet brukar vanlegvis 12-15 veker på eit utrustingsoppdrag frå dei får skroga til levering av ferdig båt. Rosendalbedrifta har også nyleg levert to arbeidsbåtar til Tombre Fiskeanlegg.
Sæberg seier fartøyet ligg for tida i sjøen og plaskar, og påpeiker dei no gjere fleire uttestingar på verftet før overleveringa om to dagar.
Fartøyet er blant anna utrusta med Palfinger krane som gir god løftekapasitet.
- Utrustinga har gått etter planen, og me ligg godt an. Det er kun nokre småjusteringar som gjeres no, fortel han til Kyst.no.
Lette lokalitetsfartøy
Ola Braanaas i Firda Seafood blir fyrst sjokkert over at Kyst.no kjenner til desse båtane.
- Hæ, korleis veit du om desse båtene? seier han og ler.
Etter at det verste sjokket var gått over, fortel han gladleg om dei nye fartøya selskapet skal få.
- Det er lette oppdrettsbåtar som skal brukast til dagleg tilsyn og lettare operasjonar. Dei skal gå på lokalitetar her i Gulen, seier han utan at han kan erindre eksakt kva slags lokaliteter det gjeld.
Dei nye båtane fortel han er meint som lokalitetsbåtar til daglege gjeremål og ikkje til store, tunge operasjonar.
- Me ser fram til å få dei på plass og gledar oss over alt som er nytt. Dei som er på anlegga ser fram til å få bytta ut dei litt eldre båtane, så får me noko med litt bedre dekksplass og som er bedre egna til dagleg bruk. Det er eigentleg ein oppgradering av flåten, fortell han.
Opdrettselskapet har for nokre veker sidan skrive følgjande post på Instagram, og lagt ut to bilder av båten som nærmar seg ferdigstilling:
– Knoll og Tott våre to små-plugger av noen arbeidsbåter nærmer seg ferdig i Rosendal. Foto: Kjell Oddvar Stendal. Saka fortset under.
Tradisjonsrikt skipsverft
Rosendal Marineservice vart stifta i 2004 og har drive med opprusting og service av fartøy dei seinare åra.
I 2016 starta dei med oppdrag for havbruksnæringen, og i 2017 med utrusting av oppdrettsfartøy og modernisering av eldre fartøy for havbruksnæringa. Og det med stor suksess. Ettersom oppdragsmengda har auka, har selskapet tilsett fleire, og er no oppe i ti fast tilsette. Les meir om dette her.
